ترک ايديب طاير طبعيم قفس پيکريمي
گيتمميش امر ايلدي پهن ايليم دفتريمي
دمبدم سسليم امداديمه ئوز دلبريمي
منده تمکين ايليوب حقه توکل ايدورم
صدقيلن حضرت زهرايه توسل ايدورم
بو خبر کي قلميم ثبت ايليور دفترده
واعظ شرع نبي نقل ايليوب منبرده
عين جرياني ده من نظم ايدورم بي پرده
يادگاري قالا مندن توکه اود صبر ايوينه
آپارام اجريني فانوس کيمي قبر ايوينه
کيچميش اياميده قاجارلرون دوراني
بير نفر شيعه اثني عشري ايراني
لکّه دن پاک و بري فطرتينون داماني
ساکن کوي ولا عاشق ربّ ازلي
ريزه خوار کرم و سفره اولاد علي
بش ياشيندا واريدي بير قيزي بيمار و نحيف
گوني گوندن اريوبدور بدني اولدي ضعيف
درد جانکاهه ولي اولمادي بيچاره حريف
في المثل شام کيمي اولدي قرا ايامي
شمع تک ياندي سو اولدي اريدي اندامي
گيجه لر ياتمادي گونوز ايلدي آه و نوا
جسمي تحليله گيدوب ميل ايلدي بس کي دوا
هيچ طبيبون او قيزا ويرمدي درماني شفا
ئورگين آتش حسرتده کباب ايلديلر
او قيزا شهرين اطباسي جواب ايلديلر
بير گيجه صبحه يوخون دوردي او قيز وقت اذان
گوزلرين اشکيله سرشار ايلدي ناله کنان
آتاسين ايتدي مخاطب ديدي اي روح روان
مني آگاه ايليون واردي اگر آيري خبر
آنام ايوده گيجه گوندوز نَيه خاطر مَلير
مطلبي روشن ايله ياخشي دگل قالسا نهان
نه ديوبدور سيزه پنهاني طبيبيم باباجان
هر نه اظهار ايليوب سنده منه ايله بيان
سوزي بي پرده دانيش خالق يکتايه گوره
ناخوشام گويلومي آل حضرت زهرايه گوره
اولجاقين حضرت زهرا خانمون آدي بيان
قيزين آغوشه آلوبدور باباسي ناله کنان
ديدي داي آغلاما بسدي ايلدون قلبيمي قان
لاله مثلي من ئوزوم دوزدي کي خونين جگرم
طاقتون اولسا ولي مطلبي روشن ديرم
ايندي حضرت زهرا آدين اظهار ايلدون
فاطمه آدينه ويردون قسم اصرار ايلدون
ساخلا يادونده ئوزون سن مني وادار ايلدون
واقعيت بودي بازار غمه واردي رواج
گوئيا يوخدي قيزيم دردووه دنياده علاج
نااميد اولما وليکن بو ايشين آخرينه
آند وير حضرت زهراني چتين گونلرينه
يارالي سينه سينه باشده قرا معجرينه
بلکه رحم ايلدي احوالوه سبحان جليل
اولموشام منده قيزيم قولسوز علمداره دخيل
الغرض صبحه کيمي ايلديلر سوز و گداز
سويونوب قاره لباسين فلک شعبده باز
آتا نوباوه سيني ايتدي دعا وقت نماز
آيريلار فصل خزاندا نجه بلبل گلدان
تاپشيروبدور قيزين اللهه چيخوب منزلدن
گه گيدوب گه دايانوب شعله چکوردي نفسي
ناگهان رحمت حق اولدي اونون دادرسي
گوردي بو نوعي گلور قافله سالار سسي
قويسا الله چيخاجاق قافله ميز وقتِ پگاه
کيمده واردور هوس کرب و بلا بسم الله
گوردي درمانده قالوب رحم ايلدي ذات حميد
مژده رحمت حق ويردي او نالانه نويد
اچيلوب ظلمت بختيده اونون صبح اميد
اللرين باشدان اوجالدوب ايلدي حمد و ثنا
ديدي اي پادشه دادگر يوم جزا
آند ويرم سني من کُرسي و لوح و قلمه
حضرت فاطمه نون چکديگي آلام و غمه
علقم اوستونده ياتان قانه بويانميش علمه
ديمورم هيچ منه رحم ايله بو احساسه گوره
بالاما ايله نظر حضرت عباسه گوره
سپري اولدي همان گون اچيلوب باب سحر
ايليوب توشه مهيّا ايکي فرخنده سير
کربلا مقصدينه باغلاديلار بار سفر
سينه لرده دُر عشقيله دولوب جعبه عشق
اولديلار همسفر قافله کعبه عشق
قافله طي مسافت ايليوب شام و سحر
بارور اولدي غرض نخل رياضتده ثمر
کاروان مقصده چاتدي قوتاروب رنج سفر
شهره بير آز قالاني نور جلي گورسندي
گوزلره قبر حسين ابن علي گورسندي
بو سوزوم گرچه دگل ذره اوزاق مطلبدن
با خبر ايستورم اولسون هامي تاب و تبدن
عشقي آرتوق اولان اشخاص اَنوب مرکبدن
شوق ياريله دوشوب تپراقا يکسر بورونوب
يوزي اوستونده حسين قبرينه ساري سورونوب
کعبه مرقد عشاقي مطاف ايلديلر
آغليوب قلبلرين گوهر صاف ايلديلر
قبر شش گوشه مولاني طواف ايلديلر
آغليوب سينه وروبلار گَله عرش اهلينه خوش
اوخشيوبلار قوزي قرباني ربابون يري بوش
نجه کي نذر ايلميشدي آتاسي پنهاني
ترک ايديبلر حرم سيد مظلوماني
قصد ايديبلر حرم طيبه سقاني
ال اله ويردي ايکي سالک فرخنده هدف
حرکت ايلديلر قبر علمداره طرف
عاقبت ايتدي تبسم اولارا چهره فال
باب سقايه طرف آچدي همالر پر و بال
يتيشوب صحن ابوالفضله ايکي نيک خصال
قاپي آغزيندا دوروب ايلديلر آه و نوا
نچه تعليم زيارت قيزينا ويردي آتا
صحن عباسيده آغوشه آلوب فرزندين
ئوپدي زيبا يوزيني دوتدي ديله دلبندين
بويننون آچدي اول خرداجا گردنبندين
اگنينه صورا گينديردي اونون قاره لباس
باشوه باغلا ديدي ايندي قرا معجرووي
آستانيندن ئوپوب توک يوزه اشک ترووي
اُسرا مثلي قيزيم سينووه قوي اللرووي
نظرين جلب ايلمک ايندي قالوبدور ئوزووه
بوردادي دردووه درمان بابا قربان گوزووه
الغرض داخل اولوبدور حرمه ناله کنان
آستانيندن ئوپوب اخذ ايلدي فيض جنان
طفل بيماري طبيبه ويريب اوّلده نشان
باغلادي بوينونا بير رشته مشکين اصيل
حرم حضرت عباسه قيزين سالدي دخيل
چرخي دونسون فلکين اولمادي سيرينده اثر
سپري اولدي بو منو اليله چوخ شام و سحر
ويرمدي ناله سي بيچاره قيزين ذرّه ثمر
قويمادي دست زمانه الي درمانه چاتا
گون به گون گل کيمي پژمرده قيزين گوردي آتا
حرمي ترک ايليوب بير گوني اول مرد خدا
طفل بيماره تهيه ايليه آب و غذا
ناگهان گوردي بو نوعي اوجالور عرشه صدا
آي حسين زائري آماده اولون هجرانه
قويسا الله قييدور قافله ميز ايرانه
بو خبردن سيخيلوب قلبي دوشوب پيچ و خمه
غرق اولوب زورق انديشه سي درياي غمه
الي قوينوندا سراسيمه قييتدي حرمه
الدي آغوشينه دُردانه سين اول فرزانه
صادقانه قيزين آگاه ايلدي جريانه
ديدي اي ميوه قلبيم سني زهراي بتول
قلبيمون باشي يانور اولما بو اندازه ملول
بو گيجه ايله فقط سختي هجراني قبول
کسيلوب چاره يولي من سني ترک ايتمليَم
قيزيم اللهه توکّل نجفه گيتمليَم
مطلبيم عفو ايليون اولدي اگر طولاني
الغرض ترک ايليوبدور حرم سقاني
گون باتان وقتي چيخوب قافله دن پنهاني
قويمادي وقتي تلف سالک فرزانه اولا
نجفه ساري مينوب مرکبينه دوشدي يولا
چوخ اميديله گيدور محضر سلطانه طرف
ئورگيندن اوجالور شعله جانسوز اسف
آغليا آغليا ورد ايليوب اي شاه نجف
گلورم محضرووه چاره سيزم غرق محن
دست خالي سني زهرا مني قيتر ميه سن
ناگهان گوردي اوزاقدن بورولوب خاک گلور
گِرد بادون آراسيندا يَلِ بي باک گلور
ايليوب سينه صحرالري صد چاک گلور
سرعتيلن يتيشوب مرکبيني ايلدي رام
چوخ وقاريله توقف ايليوب ويردي سلام
گوسترور خط مسيرون ديدي آيدين هدفي
قصد ايدبسن گورورم شوقيله شهر نجفي
شرفي اولسا کيمين ياده سالار با شرفي
گون باتور يولدا اوزاقدي سني آگاه ايدورم
ميلون اولسا سنيلن منده او شهره گيدورم
ولي اولّده مني باخبر ايله سوزووه
ندور علت کي دولوب اشک مصيبت گوزووه
گون باتان وقتي ويروبسن نيه زحمت ئوزووه
هدفون منحصراً فيض زيارتدي اگر
صبر ايليدون آچيليدي يوزووه باب سحر
احتراميله جوابينده او پاکيزه نَسَب
ديدي لطفون منه معلوميدي اي مرد عرب
ايليوبدور بالامون دردي مني غرق تعب
گيدورم درديمي مولايه حکايت ايليم
بالاسيندن ئوزينه اوردا شکايت ايليم
اشيديب درد دلين آه چکوب مرد عرب
ديدي اي مرد صفا پيشه و شايسته نَسَب
خسته سن گيتمه نجف شهرينه بو نيمه شب
صبر ايله ويرديگون اخباره ئوزوم باخبرم
مژدگاني بويون آلسون سوزي روشن ديرم
گوزووين ياشيني سيل بسدي بو اندازه فغان
او نشاني کي قيزوندان ايلدون ايندي بيان
گوردوم عباس حرمينده اوني من خنده کنان
قصدووه آگه اولوبدور پسر شير خدا
آغليان گوزلرون آيدين بالوا ويردي شفا
ماجرانين اوليندن ايله اورديدم ئوزوم
صحنيه شاهديديم واقعه ني گوردي گوزوم
گيت يوبانما ، سوزومه باورايله دوزدي سوزوم
نازدانون سني گوزلور داخي تأخير ايلمه
سني الله اوني اينجييتمه قيت تز حرمه
ديدي معلوم اولونان قاصد رحمتسن اقا
گورورم صاحب اجلال و شرافتسن آقا
آقام عباس کيمي صاحب غيرتسن آقا
ويردگون مژده اگر چه منه دنيايه دگَر
الووي وير اليمه قوليده صادق سن اگر
يا حسين کاش او آخر سوزوي ايتمدي بيان
تيتره ديب جسمينه باشدان اياقا ويردي تکان
باخدي بير ساق صولونا آغلادي بيردن اوجادان
ديدي آيا نيه سن بو سوزي اظهار ايلدون
آچورام مطلبي امّا مني سن خوار ايلدون
کيمي ياد ايلدون ايرانيده اي مرد عجم
يالواريدون آقا ناخوش بالاما ايله کرم
منه بير باخ قلبون سينوب اوندان او منم
کربلاده کسيلن ظلمينه قوللاري منم
آقامون عرصه ده غيرتلي علمداري منم
سوزيمون اوسته قولوم اولدي قلم ميداندا
ديرسگيم ساخلادي سينمده علم ميداندا
ديزي اوسته باشيمي آلدي ننم ميداندا
ديدي عباس دانيش مشتريَم من سوزووه
نيه بو حاله قالوبسان ننه قربان گوزووه
آخدوقيجا باشوين قاني هوروب گوز قاشوي
يارالي سينمه آهسته اوغول قوي باشوي
باشووين اوسته چاغير اوغلي ئولن قارداشووي
گلر امدادووه عشقي سنه چوخدي بالامون
اصغري قالدي فقط هيچ کسي يوخدي بالامون.....
