كيم عاشق اولسا گرك قلبى ياره گورسنسين
نه ياره بلكه گرك پاره پاره گورسنسين
طريق عشقيده ئولمك مقام اعظمدى
گرك صداقت عاشق نگاره گورسنسين
و گرنه مدعى چو خدور بو هرزه دنياده
هزار رنگه دوشر خوش قواره گورسنسين
كچن گجه يوخودا وصل ياره چاتمشيدم
اومنظره گوزومه كاش دوباره گورسنسين
ديديم جمالووه زلفون دوشوبدى پرده كيمين
الون فداسى الوم چك كناره گورسنسين
كمالون اولسا بويوردى جمالى بو شلارسان
دوز عاشق اول قره داش ماهپاره گورسنسين
ستون شمع وصاله يازوبديلار كى گرك
دوزعاشقين قناديندا شراره گورسنسين
دئديم دوزعاشقووم امرايله يانوم كول الوم
ثبوت عرضيمه تا بلكه چاره گورسنسين
بويوردى كيم يانان اولسا ئوزى يانوب آليشار
گوزتله مزاونا رمز و اشاره گورسنسين
خلاصه بو ايكى مصرع ايكى قولاقونده
گرك مثال ايكى گوشواره گورسنسين
ستاره اولماقا گورسون لياقتون يوخدى
بلوطدا اولما چكيل قوى ستاره گورسنسين ......